拉素讓平半笑「納」

拉素讓平半笑「納」
 
今晚意甲繼續開快車，由拉素作客維羅納演獨腳戲！主隊上場大敗予拿玻里2:6，連埋前戰不敵A米1:3，反映球隊後防有嚴重漏水問題，而拉素則4連勝轟入11球，雙方狀態有咁大差別，呢場拉素只小讓平半，仲唔快啲落注！（周四6，無綫網絡電視301頻道周五3:45am直播）

維羅納季初有啲黑馬感覺，但近幾場似乎已打回原形，近4場波輸3仗，當然嚴格啲睇，呢3場敗仗分別不敵羅馬、A米及拿玻里等前列份子，但正因為咁，球隊亦顯示出對強隊唔夠班嘅問題，而教頭文度連尼似乎亦無意喺面對強隊時打得保守，呢場維羅納繼續以攻代守，同拉素你一拳我一腳冇咩着數。

高路斯復出添信心

拉素近況令人驚喜，雖然老套啲講佢哋一向喺意甲都有一定實力，但過去幾季球隊正不斷下滑係事實，睇佢哋現時陣容，主力簡達華及碧基亞叫後生啲，其餘高路斯、莫利、列迪斯馬都已經年過30，可以好肯定佢哋呢個連勝氣勢唔會長久保持，
不過咁，始終射手高路斯啱啱復出，今季係佢最後一季賽事，鬥志唔需要懷疑，加上近況大勇嘅菲臘佐積域，現時呢隊拉素喺進攻上如魚得水，維羅納同佢哋對攻，似乎都唔會有好下場。
雙方近況差天共地，拉素今戰人腳上亦較完整，只有莫利有傷未能上陣，反而維羅納中場多傷兵，攻守都受影響，計落每一個環節都係客隊優勝，小讓平半點可以唔買。