曼城讓多唔啱“素”

曼城讓多唔啱“素”

波係圓嘅，話知你係億萬大軍，人腳鼎盛，但黑起上嚟兼球員又缺態，輸波根本唔出奇。正如曼城一樣，上場聯賽被“鎚仔幫”扑低，連埋社區盾及各項正式賽事，十四戰只得六勝四和四負，以一支超級豪門嚟講肯定唔收貨。好明顯球隊目前狀態的確起落不定，尤其後防線更加患得患失，間接影響整體發揮。

至於今晚場聯賽盃，將會主場迎戰紐卡素。近十次對陣，曼城真係食“素”咁食，取得九勝一和不敗，今季英超揭幕戰，作客亦以兩球輕取對手。理論上，曼城今場取勝機會相當高，不過聯賽盃對曼城嚟講重要性不大，兼且考慮到過兩日英超上演打吡大戰，將要火併曼聯，下周中場歐冠又要非勝不可，柏帥應該會集中精力喺呢兩場大戰，今場對住爛仔波嘅紐卡素，相信會有所保留。

紐卡素上仗作客擊敗實力派嘅熱刺後，近三戰取得兩勝一和，球員狀態與士氣不斷提升，趁曼城失勢，一於展開大平反。初盤曼城讓球半／兩球，博紐卡素贏盤最實際。

推介：和波2：2