車仔讓客有「利」可圖

車仔讓客有「利」可圖 
  
英聯盃今晚會上演多場16強比賽，其中車路士雖然星期日晚先同曼聯踢完波，但摩連奴其實無論點今晚都會進行輪換，唔使擔心體力問題下，作客乙組仔梳士貝利可以照捧「讓客」。（周二23，無綫網絡電視301頻道周三3:45am直播）

車路士星期日晚臨尾香俾曼聯迫和，但各位實在唔使擔心佢哋士氣或體力會受影響，事關摩連奴喺今晚肯定會作輪換，舒賀爾尼、約翰米基爾、穆罕默德沙拿、艾斯派古達、葛特蘇馬以及鋼門施治全部會喺今晚登場，呢支二線隊論實力喺英超都依然有得爭，踢英聯盃自然綽綽有餘。
梳士貝利目前喺英乙排第4位，近況睇落亦唔錯4連勝連贏車頓咸同約克城等對手，問題係，車頓咸同車路士雖然都係車，但級數根本差天共地，加上前愛爾蘭國腳、效力過新特蘭、史篤城等英超球會嘅隊長兼中場主力羅倫斯有傷未必打得，梳士貝利睇怕都係要目送車仔晉級居多。

般尼茅夫「布」局開大

同時間另一英超隊西布朗會造訪英冠般尼茅夫。般尼茅夫聯賽4連勝，啱啱仲作客8:0大炒伯明翰，至於西布朗就連續兩周聯賽同對手打成2:2言和，攻強守弱味道夠重，可捧入球大。（周二21，無綫網絡電視302頻道周三3:45am直播）
最後利物浦史雲斯會上演全英超對碰。利物浦冇咗史杜歷治唔識入波，今晚改用列基林拔攻堅都唔會好得幾多；另一方面史雲斯今晚亦會用上二線兵落場，踢得未必順暢下，入球細有啲計。（周二28，足智彩周三4:00am網上文字直播）