拜仁讓客「柏」案叫絕

拜仁讓客「柏」案叫絕 
 
德甲王者拜仁慕尼黑又出場嘞，雖然佢哋本周要作客出戰近況唔錯嘅慕遜加柏，但由於兩隊實力有分野，加上列貝利將會復任正選同洛賓雙翼齊飛，拜仁「讓客」放心「柏」板。（周日54，有線61、64、201及203台周一12:30am直播）

慕遜加柏目前喺德甲排上游，換言之今晚同一哥拜仁交手，係徹頭徹尾嘅榜首大戰，而且兩軍仍然保持不敗，今場大家都想破對手金身。慕遜加柏近兩戰全勝，包括喺德甲輕取漢諾威，同埋歐霸大勝阿波羅利馬素，氣勢雖然幾強，不過對手就唔算係乜嘢勁旅，戰績多少有啲假象。
拜仁慕尼黑愈踢愈好，喺德甲先後大勝漢諾威4:0同埋雲達不來梅6:0，上周中出戰歐聯更加以7:1蹂躪羅馬，教練哥迪奧拿梗係飲得杯落啦！雖然舒韋恩史迪加、堤亞高艾簡達拿、查維馬天尼斯、畢斯杜巴同埋副選門將連拿要繼續養傷，不過列貝利已經全面傷癒，歐聯後備上陣都有份建功，今晚事先張揚會踢正選夥拍洛賓雙翼齊飛，以最強配套支援湯馬士梅拿同羅拔利雲度夫斯基兩位箭頭，拜仁火力之大可以預期。

拜仁近4次到訪3勝

睇番往績，拜仁慕尼黑近4次到訪慕遜加柏都未輸過，累積3勝1和佳績，當中包括兩次德甲分別贏2:0同4:3，一次德國盃打和0:0，仲有一次友賽大勝5:1，而上屆聯賽兩循環就雙殺慕遜加柏，格食格味道好濃，所以足智彩為呢場前列大戰開讓球主客和，拜仁1.9倍「讓客」都算好穩陣。