熱刺上盤橫「素」千軍

熱刺上盤橫「素」千軍
 
學黎天王話齋，左手又係肉，手背又係肉，今晚熱刺對紐卡素都唔知點揀，前者喺歐霸大捷，後者喺英超亦再嘗贏波滋味，所以關鍵應該喺主場之利同埋往績，咁計法嘅話，熱刺半球、一球上盤開得。（周日32，now621台周日9:30pm直播）

熱刺上周英超踢早場，點知就慘負曼城1:4，中堅法斯奧更加因為領紅牌，今仗自動停賽，不過熱刺球員嘅心理病相隔幾日就醫好晒，事關佢哋喺歐霸分組賽以5:1大勝希臘球隊卓普利斯，新人哈利卡尼連中三元，阿根廷外援拉美拿亦梅開二度，兼以一記交叉腳遠射令全球嘆為觀止，只要今仗保持正常水準，食住個勢贏波唔難。

紐卡素上周英超以1:0險勝李斯特城，雖然贏得有啲勉強，但總算係終止咗近6戰不勝嘅頹勢，只係球隊嘅傷兵情況愈嚟愈嚴重，柏比斯施斯、米克威廉臣、森美艾美奧比、迪奧迪、利維亞尼、杜密特、路蘭度艾朗斯、施安迪莊、高迪同埋大衛辛頓等十幾個傷兵全部都唔出得，領隊柏祖想搏命都冇籌碼，真係巧婦難為無米炊。

熱刺近5主場4勝喜鵲

往績方面，熱刺近5次喺白鹿徑鬥紐卡素獲4勝1負佳績支持，上屆作客聖占士公園更加反客為主大勝4:0，當時幾位入球功臣包括艾迪巴約、荷西保連奴同埋查迪尼都仍然在陣，所以今場波嘅勝負關鍵，絕對係主場之利同埋數據往績，足智彩開讓球盤，熱刺讓半球、一球並唔過份，上盤力足拆「紐」。