科隆平盤「不」容錯過

科隆平盤「不」容錯過
 
德甲星期五獨腳戲，雲達不來梅近況差之餘，傷兵名單又好似水蛇春咁長，所以今晚即使有主場之利，都好難贏到科隆，足智彩開讓球盤，科隆平手盤絕對係坐走望贏，大家趁早出手。（周五22，有線61及201台周六2:30am直播）

雲達不來梅開咧後踢咗8場都未贏過，近5場德甲只係錄得1和5負嘅劣績，上周更以0:6慘敗俾拜仁慕尼黑，今季8場比賽怒失22球，士氣同埋信心都跌到落谷底，真係睇唔到佢哋有乜嘢靈丹妙藥可以起死回生，捧佢哋對家賺到笑。今仗睇死雲達不來梅嘅另一個原因，仲關乎傷兵問題，球隊嘅十字軍名單一直冇減少過，而家仲有奧利華侯辛、奧斯簡爾迪林、盧卡辛達、雲夏基、巴菲迪同埋謝比施拿斯等傷兵繼續倦勤，手頭上嘅兵源根本唔夠調動，前景灰到爆。

科隆剛贏多蒙特反底

作客嘅科隆傷兵唔多，只係得高奴巴特、希美斯同埋舒卓根3個啫，其中舒卓根只係第3號門將，而希美斯亦已失正選，所以影響可以話係零。其實科隆早前一度經歷3連敗，但係當中對手包括拜仁慕尼黑同埋漢諾威等中上游份子，冇大敗而回已經係交足功課，加埋上周終於重回勝軌，喺主場以2:1力克多蒙特，陣營內士氣即時加分，今戰即使要作客雲達不來梅都唔怕。足智彩今仗有讓球盤提供，莊家開平手盤已反映信唔過主場嘅雲達不來梅，買科隆等收錢。