熱刺讓主普天同慶

熱刺讓主普天同慶 
 
數一數手指原來熱刺由9月至今只係贏過2場波咁大把，連埋上場作客大敗喺曼城腳下，令到主帥普捷天奴非常頭痛，好在嚟到歐霸分組賽只係遇到弱旅，呢隊卓普利斯話唔定就係熱刺嘅回魂丹！（周四17，有線61及201台周五3:05am直播）

熱刺季初曾經係威係勢，不過由上個月就開始轉頹，期間只係喺英聯盃贏過諾定咸森林，英超最叻嗰場都只係擊敗過修咸頓，最難睇就係上仗以大比數不敵曼城之餘，仲俾阿古路食「大四喜」，攞紅牌出場嘅中堅法斯奧同埋卡保奧要負上最大責任，好在大家又唔使擔心呢對中路組合今晚又再夢遊球場，事關對手卓普利斯幾乎用晒希臘「本土派」，應該冇咩球員能夠作出任何威脅。
而主帥普捷天奴當然知道再咁落去都唔係辦法，莫講吓舊帥舒活喺度幸災樂禍，甚至連正選閘衛丹尼路斯都開始有怨言，現時佢最需要嘅就係一場大比數嘅勝仗令到批評者收聲，近期「弗到漏」嘅基斯甸艾歷臣同埋查迪尼應該都會落場，中前場人腳夠級數，遇到C組最弱嘅卓普利斯起碼贏一球以上。

柏迪遜難敵比錫達斯

同樣處於C組嘅柏迪遜上輪分組賽作客以0:2不敵卓普利斯，睇嚟仲未夠級數喺呢組搞鬼，遇到目前喺土超做緊榜首嘅比錫達斯，無疑係螳臂擋車，讓球開平手盤咁筍，睇嚟轉盤只係時間問題，要買趁早。（周四16，香港時間周五3:05am開賽）