維拉利爾主主「黎」料

維拉利爾主主「黎」料 
 
上季維拉利爾一開季就玩搶閘，而今季亦出現類似情況，睇見佢哋近期連贏3場之餘仲入到9球咁多，強勢出閘對住蘇黎世「主主」咪錯過。（周四13，有線64及203台周五3:05am直播）
如果呢場波係喺季中舉行，蘇黎世話唔定可以偷到雞，不過喺呢一刻踢就好難會爆出冷門，一嚟佢哋始終都係作客，二嚟隊中又冇咩星級球員，今晚輸就一定輸硬，只係唔知道點樣輸法啫！始終維拉利爾喺A組首輪作客1:1和到慕遜加柏就證明到佢哋嘅實力係同組最強，而佢哋近期先後擊敗阿波羅利馬素、切爾達，同埋艾美利亞入9球之餘同時亦僅僅失咗1球，特別係尼日利亞前鋒烏捷同埋新秀謝拉特摩蘭奴開始擦出火花，甚至係前巴塞少將查維亞艾斯賓路沙都有表現，只要三線有正常發揮就必定贏到，不過都唔好睇漏「黃潛」近期一贏就必定領先埋半場，可以放棄大熱主勝捉「主主」。
而慕遜加柏喺A組連和兩場，打後嘅賽事已經唔容許有任何失誤，好在嚟自塞浦路斯嘅對手阿波羅利馬素只係同組魚腩，唔把握呢次黃金機會大炒對手開齋仲等幾時？（周四12，香港時間周五3:05am開賽）