里爾天生「愛」和波

里爾天生「愛」和波
  
周四晚又到歐霸之夜，當中喺英超重拾正軌嘅愛華頓會作客法國嘅里爾，論實力應該高一線，不過小心「拖肥糖」已有4分在手，今次作客和波一分亦冇所謂，里爾喺歐聯附加賽已反映出唔識打主攻，換言之雙方鬥穩陣下，今場好有可能開出和局，和波賠率極熱實在要優先留意。（周四4，有線61及201台周五1:00am直播）

愛華頓喺今屆歐霸賽事經常遣強陣應戰，但此舉亦影響球隊英超表現，似乎要兼顧兩條戰線都一定要採取輪換政策；而事實上，因應歐霸出線難度唔大，佢哋又冇需要吓吓搶晒3分，所以領隊馬天尼斯喺歐霸排陣上，都會採取一個宗旨，就係主場出戰強陣，作客就出部份副選只求一分，上場對卡斯洛達已見佢哋用上吉遜等副選，所以上場聯賽冇正選嘅麥基迪、基斯甸艾素及希拔等，都應有可能正選出戰，前線甚至可能俾盧卡古唞唞，由伊度奧取代，愛華頓攻力肯定受到影響。
里爾今屆本來有機會出戰歐聯，可惜附加賽不敵波圖，過程上所見，球隊中場策劃力極疲弱，前線只靠路蘭洛斯及奧歷治零星反擊，肯定係一支守強於攻嘅球隊，所以實際上，如果里爾對手唔採取主動，里爾係好難打出應水準，所以估計愛華頓都係求一分下，呢場出現和局機會的確大。

基輔作客丹麥未驚過

至於同時間開波都有多場賽事，首選阿爾堡對基輔戴拿模一戰；基輔係一支有打殺入歐聯16強嘅球隊，打歐霸分組賽根本超晒班，配上6場連勝佳態，呢場作客丹麥根本未驚過。（周四7，香港時間周五1:00am開賽）
最後拿玻里將作客年青人，瑞士嘅年青人正值3連敗，而拿玻里經歷季初低潮後已5場不敗，逐個秤亦超班，今場又睇盃賽專家賓尼迪斯表演。（周四6，香港時間周五1:00am開賽）