皇馬上盤「利」潤豐厚

皇馬上盤「利」潤豐厚
 
歐聯B組重量級大戰，利物浦喺晏菲路擺下擂台等皇家馬德里到訪，就算受讓半球、一球都冇着數可言，因為兩隊嘅歐戰經驗同實力有差距，紅軍未必頂得住銀河艦隊，上盤絕對有「利」。（周三13，有線61及201台周四2:45am直播）

除咗運氣，利物浦其實冇乜可取，上輪英超對昆士柏流浪憑對手兩度擺烏龍，最終先以3:2險勝收場，估唔到史杜列治要延遲復出嘅影響會咁大，皆因紅軍今夏重點收購嘅巴洛迪利完全交唔到貨，對昆士柏流浪一戰試過空門失機，而早前歐聯對巴素利更加未試過喺禁區內觸球，難怪意大利國家隊改由干地執教之後，就一直冇再徵召巴神，呢位前鋒大部份時間都喺度夢遊。

利物浦眾將輸經驗

史達寧、拉爾拉拿同埋佐敦軒達臣三位英格蘭國腳嘅狀態其實唔錯，無奈佢哋職業生涯參加歐聯嘅機會唔多，今仗點都要老大哥兼隊長謝拉特帶住嚟踢，而後防漏洞多亦係利物浦今季特色，門將米洛列特唔穩陣，洛夫雲加盟後又無法重演修咸頓時期嘅水準，即使左閘會用番艾拔圖摩蘭奴取替荷西安歷基，但相信效果同變化都唔大。

皇馬前面交到功課

皇家馬德里已經累積咗7連勝，呢段期間佢哋唔單止遇神殺神，而且仲要次次都上演大屠殺，當中包括以5:1輕取巴素爾、又係5:1贏艾爾切、8:2炒拉科魯尼亞、5:0大破畢爾包，上場西甲又開多次5:0，而遭殃嘅對手就係利雲特，火力相當恐怖，雖然加里夫巴利受傷唔踢得，但取代佢嘅艾斯高上周射入世界波，信心即時番晒嚟，加上C朗呢期腳風超順，賓施馬、占士洛迪古斯同埋借將查維亞靴南迪斯亦個個交到貨，進攻夠立體又全方位，嚟到晏菲路都唔驚。
足智彩今仗有讓球盤提供，皇馬作客讓半球、一球絕對唔過份，以佢哋呢期嘅勇態，贏半個盤係最低消費，贏晒亦屬正常。