巴塞招「積」開硬讓主

巴塞招「積」開硬讓主

歐聯F組賽事，巴塞隆拿喺魯營球場迎戰阿積士，要贏波攞晒3分絕對冇懸念，因為呢支西甲巨人唔止實力秤先，連往績都有優勢，足智彩開讓球主客和，巴塞讓兩球都可以開「讓主」威威！（周二5，有線62及202台周三2:45am直播）

巴塞隆拿近兩場西甲都輕鬆取勝，分別以2:0擊敗華歷簡奴，同埋3:0大勝伊巴，而其實球隊上次喺歐聯會不敵巴黎聖日耳門，主要原因係達史特根犯錯，相信教練安歷基今仗會派遣哥迪奧巴禾打正選，畢竟後者喺西甲破咗最長時間不失球紀錄，論經驗、論狀態、論穩定性，點都好過達史特根。搞得掂後防，巴塞其實就冇嘢好驚，因為佢哋前線有美斯、尼馬同埋拿傑迪錫等高質進攻球員，讓幾多球都唔係大問題。

阿積士喺歐聯同埋荷甲累積3連和，球隊今屆放走施安迪莊之後，似乎仲未調節到，單靠冰島前鋒史基賀臣喺前線橫衝直撞都唔係辦法，而且佢哋上屆都試過作客魯營，結果慘敗0:4，今場歷史重演都唔出奇，巴塞「讓主」可以跟進。

巴黎半客放心捧場

同組巴黎聖日耳門勇闖塞浦路斯尼科西亞，預計可以輕鬆獲勝，但由於讓一球有少許難度，可搏聖日耳門快刀斬亂麻，半場已經取得領先優勢，聖日耳門半場客勝有1.92倍，真係非常抵玩，因為佢哋上場連巴塞隆拿都可以砌低，睇嚟伊巴謙莫域受傷都唔算好大影響，仲有個卡雲尼可以頂住，尼科西亞冇乜星級球員坐鎮，要爆冷根本冇籌碼。（周二4，香港時間周三2:45am開賽）