曼城讓客「軍」令如山

曼城讓客「軍」令如山
 
歐聯E組賽事，曼城雖然要遠征東歐挑戰莫斯科中央陸軍，但由於後者被罰閉門作賽，變相冇咗主場氣勢，加上藍月亮背城借一，鬥志肯定夠旺盛，「讓客」2.4倍「軍」令如山！（周二2，有線61、64、201及203台周三12:00am直播）

莫斯科中央陸軍喺分組賽兩戰全敗墊底，作客慘敗俾羅馬1:5，同埋主場0:1不敵拜仁慕尼黑，都反映出呢支俄羅斯球隊未夠班喺歐聯角逐，雖然佢哋啱啱喺俄超以6:0怒炒古賓，本土賽事錄得5連勝佳績，無奈今仗撼曼城唔可以「夫添」，陣中最大名氣嘅迪沙哥耶夫，仲有瑞典外援韋恩邦姆都要坐波監，教練史洛斯基肯定頭痕，若然歐聯出線機會唔樂觀，不如留番啲力爭俄超仲實際，畢竟中央陸軍暫時落後緊俾辛尼特，勉強雙線作戰隨時兩頭唔到岸，搏唔過呀！
曼城喺歐聯同樣都係開局不順，輸俾拜仁之後，再喺主場俾羅馬迫和，搞到兩戰不勝得1分，今晚對中央陸軍再有差池，就會俾6分嘅拜仁同埋4分嘅羅馬逐漸放離，領隊柏歷堅尼已講到明是役係生死戰，否則要突圍歐聯分組賽凍過冰水。

耶耶托尼代林伯冇蝕底

林柏特喺上場英超對熱刺時受傷，今仗肯定要缺陣，不過耶耶托尼當時休戰，養精蓄銳落場撼中央陸軍，而食出大四喜嘅阿古路腳風超順，預期會夥拍迪斯高一齊攻堅，加上大衛施華、捷西斯拿華斯同埋占士米拿等中場球員冇傷病，可以為一對箭頭提供源源不絕嘅輸送，藍月亮勝望始終較濃，咪忘記中央陸軍今場波係閉頭作賽，冇咗主場球迷支持，同失去地利冇分別。

藍月亮上季雙殺中央陸軍

其實兩隊喺上屆歐聯分組賽已經碰過頭，當時曼城雙殺中央陸軍，主場大勝5:3，作客就贏2:1，格食格味道好濃，所以足智彩開讓球主客和，背城借一嘅藍月亮捧場價值好高，2.4倍「讓客」唔怕買。