巴塞皇馬打吡前壯聲威

巴塞皇馬打吡前壯聲威 
 
西班牙國家打吡今個周末就開波，而巴塞同皇馬都以一場聯賽勝仗為自己打氣，其中巴塞憑美斯同打破230日入球荒嘅沙維各建一功，主場3:0大破伊巴；至於較早時間登場嘅皇馬，就有C朗又入兩粒，作客以5:0大破利雲特。

巴塞今周面對升班馬伊巴，雖然表面上係幾輕鬆，由沙維、尼馬同美斯下半場各入一粒主場贏3:0，但實情伊巴上半場有兩個單刀機會，結果一個射斜，一個過唔到龍門哥迪奧巴禾，巴塞先得以大勝而回。點都好啦，巴塞今次之勝都係可喜可賀，首先球隊聯賽踢8場一球不失，令哥迪奧巴禾不失球紀錄增至720分鐘；此外，老將沙維唔經唔覺已經230日冇入過波，對上一次建功已經數到今年3月3號對艾美利亞比賽，而今球亦係沙維職業生涯第100個入波。最後梗要講埋美斯，佢今場入一粒，西甲總共入咗250球，如果周末對皇馬再入波，更可追平薩拉251球紀錄，成為西甲史上並列第一位射手，相信美斯自己都想係呢場重要比賽達標啦。

C朗8場入15球無人能阻

講完巴塞就講皇馬，佢哋作客利雲特憑C朗梅開二度，加上J洛、小豆同艾斯高各入一粒大勝5:0。值得一提C朗又起孖，聯賽8戰已經入咗15球，除咗皇馬本身以及巴塞、華倫外，入球數比起其餘17支球隊今季全隊總和都要多；此外，C朗連續8場聯賽入波，亦已迫近自己連續11場聯賽有波入紀錄，就睇吓國家打吡會唔會令佢斷纜啦。