撐拿玻里下盤得米

撐拿玻里下盤得米

意甲上演名牌大戰，國際米蘭表現反反覆覆，有主場之利都信唔過，相反拿玻里已經累積3連勝，開始踢出強隊應有嘅風範，受讓平手、半球絕對係物超所值，下盤得「米」！（周日57，無綫網絡電視301頻道周一2:45am直播）

國際米蘭近兩場意甲都輸波，分別慘敗俾卡利亞里1:4，同埋0:3負費倫天拿，兩場波加埋失咗7球，防線明顯有問題。門將漢丹洛域今季表現慌失失，成為傳媒口誅筆伐嘅對象，加上長友佑都、迪岩布斯奧同埋甘柏拿路幾位後防大將全部受傷，連防守中場加利美度都傷埋，又難怪藍黑兵團嘅失波數字去到咁驚人嘅程度。
國米嘅十字軍名單並唔止咁少，高華錫、古亞連同埋奧斯華度呢3位中前場球員同樣要倦勤，其中奧斯華度仲係球隊首席射手，入波仲多過莫路伊卡迪，而家攻又唔得，守又唔得，真係進退失據。相對嚟講，拿玻里就醒好多喇，近3場比賽全勝，包括1:0贏薩斯索羅、2:1贏拖連奴，仲有喺歐霸以2:0擊敗施洛雲，早前被指經常發脾氣唔聽指令嘅荷西卡利祖，已經同領隊賓尼迪斯冰釋前嫌，近3仗仲轟入兩球，加上希古恩、咸錫同埋恩斯治尼等攻擊球員持續有好表現，拿玻里呢期嘅氣勢真係好難勒得住，睇嚟有排贏。

作客聖西路往績唔差

睇埋往績，拿玻里近3次作客聖西路，對住國米錄得1勝1和1負，表現絕對唔輸蝕，所以足智彩今仗開出讓球盤，藍黑兵團讓平手、半球根本冇把握，搏拿玻里下盤起碼收一半，就算反客為主贏晒成個盤都唔奇。