史篤城上盤「斯」人醒

史篤城上盤「斯」人醒
 
位列英超下游嘅史篤城，今晚有機會攞晒3分暫解護級壓力，因為佢哋嘅對手史雲斯有大將缺陣，加上喺對賽往績方面，史篤城有一定嘅優勢，讓平手、半球開上盤機會高唱入「雲」。（周日38，now621台周日11:00pm直播）

史篤城上場英超以1:3不敵新特蘭，終止咗兩連勝嘅氣勢，好在球隊近8戰都只係輸過兩場咁大把，整體走勢唔算太差，而且陣中幾位傷兵都開始復操，包括格連韋倫、阿拿奧杜域、域陀摩西斯同埋謝夫甘馬倫，只有奧丹維治同馬美迪奧夫係肯定唔出得，傷病情況已顯著改善，而且長人中鋒高治今季有鹹魚翻生跡象，早前對紐卡素一箭定江山，另外對昆士柏流浪亦有士哥，史篤城今晚食粥食飯都係靠晒高治。

史雲斯近5場英超只係得1勝2和2負，成績較季初大為失色，而上場同紐卡素賽和2:2一役，更加係兩度領先都被扳平，領隊蒙克坦言已影響咗球員士氣，最慘係主力中場舒維爾停賽，組織能力一定弱咗，而佐迪阿馬特、羅利唐納利同埋里安比頓亦因傷未能趕及上陣，想變都無能為力。史雲斯近兩場英超作客都贏唔到，分別以2:4負車路士，同埋0:0賽和新特蘭，幾位攻擊球員好似尼敦戴亞同魯迪治都唔識作客入波。

史篤城往績一面倒

睇番往績，史篤城喺主場對史雲斯嘅表現絕對唔失禮，近6次交手共錄得4勝1和1負佳績，而且已經連續3次主場冇輸過俾天鵝兵團，數據上確實穩打穩紮，所以史篤城今晚少讓平手、半球要得過，上盤食天鵝肉。