拜仁讓主「不」容錯過

拜仁讓主「不」容錯過

拜仁慕尼黑季初打咗一輪孤寒波之後，近期終於做番銀行隊，幫球迷波盤齊贏，今晚佢哋嘅對手係墊底份子雲達不來梅，預計3分手到拿來，即使讓球主客和狠開「-2」，「讓主」都可靠。（周六22，有線61及201台周六9:30pm直播）

季初嘅拜仁的確衰衰格格，經常小勝兼開入球細之餘，更加試過同低沉嘅漢堡打和，相信唔少捧場客都損手爛腳，不過佢哋喺國際賽檔期前突然良心發現，以4:0大炒漢諾威贏波贏盤兼開入球大，主要原因當然係羅拔利雲度夫斯基愈嚟愈融入球隊，呢位波蘭前鋒喺對漢諾威一戰梅開二度，加上洛賓都入兩粒，結果湊成大捷。

不來梅開季未贏過

後備門將連拿、守將畢斯杜巴、查維馬天尼斯、舒韋恩史迪加同埋堤亞高艾簡達華要繼續養傷，後者比較慘情，佢係復出之後再觸傷舊患，依家又要再做手術，預計會長期缺陣，好在拜仁板凳深度夠晒厚，湯馬士梅拿、馬里奧葛斯同埋列貝利都可以候命，整體實力依然係咁強勁。
相反地，今晚作客安聯球場嘅雲達不來梅，開咧後一場正式比賽都未贏過，最叻只係德國盃第一圈加時淘汰低組別球會伊勒迪森，然後就累積7場不勝直至今時今日，雖然阿根廷前鋒迪山度做足本份頻頻「士哥」，但入埋都唔夠後面輸，加上球隊傷兵情況未好過，奧利華侯辛、奧斯簡爾迪林、雲夏基、盧卡辛達同埋巴菲迪等人全部倦勤，正選門將史特利賓加今仗仲要停賽，對住拜仁慕尼黑肯定冇運行，主隊狠讓兩球都要買「讓主」。