曼城讓主天官「刺」福

曼城讓主天官「刺」福
 
為環保唔食魚翅可以理解，但係衛冕嘅曼城矢志要攞3分逐鹿英超，相信點都唔會放過熱刺喇，適逢客軍有首席射手查迪尼受傷，「讓主」有2.08倍真係啖啖都咁好味，今晚一齊食「刺」啦！（周六18，now621台周六7:45pm直播）

曼城喺大戰前夕傳嚟耶耶托尼上陣成疑，究竟係長途跋涉由非洲番嚟太疲累，抑或係踢完國際賽有傷呢？咁就真係冇人知，亦唔排除係煙幕，好在今夏高價引入嘅費蘭度法蘭斯高已經傷癒，林柏特亦證實寶刀未老，所以耶耶托尼即使同費蘭甸奴齊齊缺陣都冇乜影響，畢竟富豪球會勝在人多勢眾，每個位置都有最少兩個替補。

曼城前線鐵三角狀態好

迪斯高喺歐國盃外圍賽表現唔錯，阿古路喺香港直情冇落過場，呢兩位前鋒都準備好今晚合作攻堅，另外大衛施華代表西班牙出賽獲一致讚賞，繼續由佢策動球隊攻勢肯定具威脅，加上曼城近4次主場對熱刺贏晒，往績都有絕對優勢。
熱刺想喺作客環境下破數據唔容易，因為佢哋喺國際賽檔期前贏修咸頓都好險，加上陣中首席射手查迪尼喺代表比利時嗰陣受傷，冇咗佢負擔入球重任，單靠艾迪巴約、蘇爾達杜同埋新人哈利卡尼，真係好難令人有信心，更何況正選門將洛里斯又中埋FIFA病毒，代表完法國友賽葡萄牙已報稱受傷，連第二場友賽對阿美尼亞都冇踢，教練普捷天奴話要做個最後體測，先知洛里斯踢唔踢得，換言之熱刺攻守都有隱憂。

熱刺中FIFA病毒多傷兵

鑑於曼城上屆雙殺熱刺，而且仲殺得幾甘，作客贏5:1，主場炒6:0，相信今屆都唔會例外，足智彩開讓球主客和，藍月亮開硬「讓主」，有2.08倍回報，呢餐「刺」認真和味，大家起定筷準備開餐啦！