曼城衝“刺”

曼城衝“刺”

英超今晚戰火重燃，早場隨即上演好戲，由曼城火併熱刺。睇返近年對賽，曼城佔得絕大優勢，近七次碰頭，“藍月亮”取得六勝一負，上季雙殺熱刺，兩場加埋贏十一比一，熱刺兵敗如山倒。今晚坐鎮主場出擊，對住手下敗將，曼城“大廚”應可劏定隻雞，準備燉“刺”。

熱刺雖然屬於實力派，平均人腳亦唔差，可惜彈極都彈唔起，踢來踢去始終“阿四”都做唔到，證明對住強隊，熱刺都係冇運行，上季到訪伊蒂哈德球場慘吞六蛋，今晚重臨傷心地，睇怕再次難逃一劫。初盤曼城讓一球／球半，推介“藍月亮”可以大“熱”勝出。

曼城上場作客兩球擊敗維拉，柏帥對贏波當然開心，更開心係睇到球員狀態已逐漸提升，尤其球隊核心杜尼已開始發揮應有水準，仲有射手阿古路。加上穩定性十足嘅“林伯”與大衛施華，曼城超強嘅攻擊火力又再重現。

熱刺表現卻相當飄忽，特别防線穩健程度不足，對住重火力球隊，更加危危乎。

推介：曼城3:0