阿聯主場「勝利」在望

阿聯主場「勝利」在望
 
澳職今日下晝又提供早場俾大家過吓手癮，暫列榜首嘅阿德萊德聯同埋墨爾本勝利將正面交鋒，兩軍論狀態論實力可謂平分春色，不過阿德萊德聯有主場之利，少讓平手、半球上盤依然可取。（周五1，有線64及203台周五4:40pm直播）

阿德萊德聯今場有多位年輕球員因為要參與U19亞錦賽而缺陣，包括保羅艾素、馬比、馬克奧治寧同埋班捷文禾蘭，另外佐敦艾斯同埋甘馬倫屈臣就分別因手、腳受傷，同樣會倦勤，好在奧沙麥馬歷嘅小腿傷患已痊癒，荷西卡斯奧亦已操起狀態，人腳有一定保證，主場出擊可取。
開鑼戰作客以2:1擊敗衛冕嘅布里斯班獅吼，由前傑志主帥甘巴爾執教嘅阿德萊德聯，目前嘅士氣絕對唔差，幾位新兵好似奇治葛雲、戴恩麥高雲同埋柏保路山齊士都踢足90分鐘，好快就證明咗球隊冇入錯貨，雖然今仗會移師到第二主場阿德萊德橢圓球場交手，但聽講賣飛情況依然好理想，高朋滿座場面可期。

勝利多主力球員缺陣

墨爾本勝利喺第一周賽事同樣報捷，喺主場以4:1大勝亞冠盃決賽隊伍西悉尼流浪者，幾位新兵好似貝利沙同埋迪比亞亦好快融入，不過墨爾本勝利一樣有好多球員要踢U19亞錦賽，包括佐敦布朗、史葛加路維同埋梅拿尼，另外有尼高拉斯安素腳傷未癒，大將米利根就未操起狀態，頂盡只會做後備，球隊難以排出最佳陣容。
今仗嘅勝負分野係主場，根據往績，近6次兩隊交手，有5次都係主場一方勝出，另一次就係和波，換言之主場嗰隊始終唔使輸，所以阿德萊德聯讓平、半要得過。