波蘭和局「德」心應手

波蘭和局「德」心應手
 
波蘭對德國，即係細佬對大佬，要知道近年德國隊就有好多喺波蘭出生嘅球員，再加上波蘭兵唔少主力都喺德國聯賽搵食，雙方熟路程度之高已經唔需要解釋，睇埋兩隊首戰都開贏波各有3分在手，開個和局大家閉門一家親有咩出奇。（周六43，有線61及201台周日2:45am直播）

雙方太熟路難分高下

首先從結果論，德國喺呢組要出線其實冇壓力，同組除波蘭之外就只有愛爾蘭算得上搞事份子；而事實上，德國今場真係好有放分俾波蘭嘅動機，佢哋今次入選名單中，除咗退咗役嘅拿姆同高路斯之外，陣中加入唔少年輕面孔，不過勒夫竟然繼續選普多斯基入伍，就真係令人有啲意外，始終呢名射手今季喺阿仙奴完全冇正選機會，德國又咁多新星，要揀都一定大把選擇，唯一解釋係今場勒夫希望俾普多斯基重返老家波蘭獻技，似乎呢場波似友賽多過外圍賽。
波蘭方面，利雲度夫斯基都話對德國球員太熟路，今場感覺幾特別，事實唔單止佢，波蘭眾多主力如比斯錫、保尼斯治等都喺德甲搵食，對德國球員踢法唔會陌生，睇吓世界盃前雙方友賽一樣踢成0:0，就明白波蘭喺主場絕對不落下風。
可能有人認為今場始終係外圍賽，德國都可能會認真咁解決波蘭，但人腳上，佢哋冇咗前隊長拿姆，新隊長舒韋恩史迪加亦冇入選，有啲蜀中無大將感覺，呢場和波穩陣攞1分可能真係德國最終目的。