巴西阿根廷「和」氣生財

巴西阿根廷「和」氣生財
 
巴西同阿根廷決戰北京鳥巢，為廣大中國球迷送上超強戲碼嘅友誼賽，兩軍出場陣容已經事先曝光，加上呢對南美勁旅知己知彼，中立場拍跳和波機會好大，買和局係最好嘅選擇。（周六16，無綫網絡電視302頻道周六8:05pm直播）

喺鄧加「二進宮」再執教之後，巴西已經喺熱身賽連勝哥倫比亞同埋厄瓜多爾，但呢位教練嘅保守作風不改，贏都贏得孤寒，莫講話贏盤，捧場客想睇個入球大都有難度，莫非係鄧加出身於防守中場，所以戰術同理念都側重防守？事實上，鄧加喺揀人方面一樣保守，雖然熱身賽將會連續對阿根廷同日本，不過處男兵就只得聖保羅中場祖斯夫蘇沙、國際米蘭後衛杜杜、莫斯科中央陸軍右閘馬里奧費南迪斯，同埋只係陪練嘅第三號門將馬些路哥希，完全冇驚喜。

尼馬夥拍迪亞高泰達利

多個媒體包括《馬卡報》都事先張揚巴西今晚嘅出場陣容，尼馬將會夥拍迪亞高泰達利攻堅，路爾斯古斯達禾、奧斯卡杜斯山度士同埋韋利安就會合組中場線，而由於堤亞高施華仍未傷癒，所以大衛雷斯會同祖奧米蘭達合作踢雙中堅。

美斯將移前支援阿古路

阿根廷呢邊一樣事先公布出場陣容，教練馬天奴會犧牲希古恩，搵球王美斯同阿古路夥拍雙箭頭，寧願打多個中場同巴西爭控球權，所以迪馬利亞、馬斯真蘭奴、柏斯托尼同埋安素佩雷斯會聯手打4個中場，穩陣有餘，但侵略性就欠奉，加上阿根廷仲要嚟香港呢邊踢友賽，相信好多主力都唔會踢足90分鐘。
世界盃不敵德國屈居亞軍之後，阿根廷即刻約番德國拍跳，結果以4:2獲勝，但係呢場波復仇意味好重，好難同一般友誼賽相提並論，今晚同巴西交手，喺知己知彼之下，和局係最佳選擇。