意大利夠「疆」開讓主

意大利夠「疆」開讓主
 
歐國盃H組賽事，意大利會喺主場對弱旅阿塞拜疆，就算狠讓兩球都可以捧場，因為自從干地執教之後，藍衣兵團士氣好咗好多，派路又肯出山幫忙，所以1.75倍嘅「讓主」一定會搶「疆」開出。（周五14，有線63台周六2:45am直播）
冇咗巴洛迪利唔緊要喎，因為呢位利物浦前鋒根本嚴重缺態，有佢喺度反而阻頭阻勢，干地真係睇狀態揀人，而唔係一味盲目追求名牌，就以加斯安奴柏利為例，呢位射手雖然只係效力英超中型班修咸頓，但由於季初表現突出，干地一樣照選，咪忘記仲有效力多蒙特嘅恩莫比尼同埋祖雲達斯嘅基奧雲高，意軍火力好強大呀！
可能係同干地共事得耐，所以老友鬼鬼，派路甘願做守唔到寡嘅姣婆，決定復出幫意大利助拳，至於其餘星級球員好似莫達、馬高華拉堤、馬治斯奧、基亞連尼同埋保方亦全數入選，試問實力平平無奇嘅阿塞拜疆點頂，捧意軍「讓主」。

保克之戰可捧和局

同組保加利亞會喺主場對克羅地亞，兩軍喺首輪賽事都贏波而回，喺氣勢方面絕對係不相伯仲，雖然論實力以克羅地亞佔優，事關佢哋有莫迪歷等優質球員，但考慮到保加利亞有主場作後盾，可以拉近番彼此之間嘅差距，故此今戰可以避重就輕，揀個3倍嘅和局，乘落意大利相當好分。（周五12，香港時間周六2:45am開賽）