捧威爾斯贏「波」贏盤

捧威爾斯贏「波」贏盤
 
歐國盃外圍賽B組賽事，日漸強大嘅威爾斯喺主場迎戰波斯尼亞，有權全取3分向住決賽周進發，足智彩有讓球盤提供，威爾斯受讓平手、半球相當合理，捧下盤有1.97倍，齊齊贏錢贏「波」！（周五19，有線64及203台周六2:45am直播）

威爾斯喺首輪賽事驚險擊敗弱旅安道爾2:1，好多人都覺得威爾斯冇鬼用，但實情係有啲球隊識玩穩守突擊，偏偏唔識主導進攻，因為好似加里夫巴利呢啲快馬，最啱就係喺快速反擊嘅時候大派用場，所以威爾斯今晚對波斯尼亞嘅戰術同臨場表現，唔應該同安道爾一役相提並論。

艾朗藍斯倦勤唯一隱憂

領隊基斯高文雖然要面對阿仙奴中場艾朗藍斯受傷缺陣嘅影響，另外包括祖阿倫、占士哥連斯同埋杜美特都因傷唔踢得，不過威爾斯陣中仍不乏當打戰將，門將軒尼斯、中堅艾殊利威廉斯同埋中場禮利都係好波之人，更加唔可以忘記效力皇家馬德里嘅加里夫巴利，主場出擊秤高一線。

教練蘇錫成波國球員公敵

波斯尼亞陣容當然都唔差啦，畢竟佢哋有份踢今夏世界盃決賽周，喺曼城前鋒迪斯高領軍之下，有比真歷、比高域同埋伊比斯域坐鎮嘅波斯尼亞甚具侵略性，但係佢哋喺分組賽第一輪爆冷輸俾塞浦路斯，就顯示出球隊內部有問題，原來波斯尼亞國內正蘊釀杯葛教練蘇錫，有唔少球迷都話長痛不如短痛，既然蘇錫冇能力提升波斯尼亞嘅檔次，早啲炒咗佢再換帥可能仲好。
消息更話蘇錫喺更衣室內已經失去威信，跟慣一級教練嘅迪斯高亦嫌佢冇料，帶頭唔聽蘇錫指揮，如果呢啲料真係堅，波斯尼亞確實幾大鑊，今晚作客卡迪夫城再輸唔出奇，球迷不宜沾手。
足智彩今仗有讓球盤提供，威爾斯喺主場出擊都受讓平手、半球，絕對係合情合理，而且賠率暫時仲有1.97倍，莊家食水亦唔算深，呢注下盤可望「波」盤齊贏。