英格蘭讓5球放「馬」過嚟

英格蘭讓5球放「馬」過嚟 
 
歐國盃外圍賽E組6隊今晚一次過出場，牌面最弱嘅聖馬力諾要作客嚟到倫敦嘅溫布萊，做硬英格蘭嘅點心，因為兩隊近4次對賽，三獅軍團全勝兼轟入26球，平均一場入6.5球，讓5球都梗係捧「讓主」。（周四4，有線61及201台周五2:45am直播）

由於愛華頓嘅史東斯受傷，領隊鶴臣特別補選咗阿仙奴嘅哥林張伯斯，不過英格蘭今晚對聖馬力諾應該冇乜壓力，後防出邊個都影響唔大，最重要係上場分組賽對瑞士有佳作嘅韋碧克可以落場，與前曼聯隊友朗尼一齊負責攻堅，夠晒火力數胡。
聖馬力諾揀咗4個初哥入伍，教練文沙奴利仲話會用23歲門將梅拉仙尼同埋19歲後衛施薩連尼打正選，話要俾佢哋吸收經驗預備接班，不過面對英格蘭嘅星級球員，驚佢哋處男下海就嚇親啫，畢竟三獅軍團近4次對聖馬力諾全勝兼攻入26球，平均一場入6.5球，「讓主」開「-5」啱啱好，梗係熱撐英軍。

立陶宛讓唔起愛沙尼亞

同組立陶宛對愛沙尼亞就難估啲，事關主隊立陶宛有多名主將因傷退隊，包括丹超阿爾堡前鋒施柏尼斯同埋漢諾威後衛史坦基域斯，所以有多位外流球員坐鎮嘅愛沙尼亞比較可靠，受讓一球雖然低水只得1.68倍，但呢注「讓客」真係「立」於不敗之地。（周四7，香港時間周五2:45am開賽）

瑞士勢可挫斯洛文尼亞

本來喺E組預計會成為出線大熱嘅瑞士，由於分組賽首輪輸波，今晚作客斯洛文尼亞真係要打醒十二分精神，好在對手已經連續4場國際賽落敗，士氣跌到落谷底，有拜仁球星梳頓沙基利、祖雲達斯後衛列治史迪拿，同埋弗賴堡射手美密特支撐嘅瑞士，始終較值得睇好，客勝2.2倍要跟。（周四10，香港時間周五2:45am開賽）