利物浦讓主執到「堡」

利物浦讓主執到「堡」  
 
英格蘭聯賽盃第3圈賽事，利物浦喺主場接受英冠份子米杜士堡挑戰，鑑於紅軍作風上一向重視盃賽，而且最近成績麻麻，是役喺晏菲路當然想勝出漂亮一仗，「讓主」係意料中事。（周二41，無綫網絡電視301頻道周三2:45am直播）

利物浦雖然喺歐聯贏波，不過近兩場英超都全失3分，表現令人失望，雖然多線作戰係辛苦，但紅軍目前實力未足以指望奪英超同歐聯，故此聯賽盃依然係佢哋重視嘅戰場，預計部份邊緣球員好似列基林拔同拿沙馬高域都想爭取表現。

米杜士堡喺英冠3連勝，不過當中嘅手下敗將哈特斯菲爾德、卡迪夫城同埋賓福特嘅實力，唔足以同英超嘅利物浦相提並論，何況睇番往績，米堡近4次作客晏菲路全部輸晒，今時今日更加難爆冷，所以紅軍嘅「讓主」要開出冇難度。

阿仙奴讓唔起修頓

阿仙奴同修咸頓就會喺聯賽盃第3圈上演英超內訌，兵工廠雖然喺上場英超大勝維拉，終止3戰不勝走勢，不過佢哋最近好頻撲，加上領隊雲格喜以新人出戰聯賽盃，預料呢個習慣嚟到今屆都唔會改，變相拉近同對手實力，讓波勉強。
修咸頓氣勢超強，近4場波全部贏晒，包括喺聯賽盃淘汰英冠球隊米禾爾，仲有喺英超連勝韋斯咸、紐卡素同埋史雲斯，射手加斯安奴柏利狀態同腳風不俗，領隊朗奴高文強調唔想打斷走勢，所以唔會進行大輪換，擺到明想逐鹿聯賽盃，是役作客酋長球場有得受讓，絕對係筍盤，捧修咸頓「讓客」正路。（周二37，香港時間周三2:45am開賽）