尼科西亞讓客切「塞」

尼科西亞讓客切「塞」 
 
歐聯F組演強弱懸殊戲碼，西甲巨人巴塞隆拿喺主場對塞浦路斯尼科西亞，不過足智彩似乎過份高估巴塞，讓球主客和要讓3球咁誇張，換言之尼科西亞淨負兩球都贏盤，「讓客」更合乎經濟原則。（周三9，有線62及202台周四2:45am直播）

巴塞隆拿開咧後其實冇乜霸氣，可能同傷兵多有關，畢竟丹尼爾有傷在身，新援華美倫又未百份百痊癒，恩尼斯達同埋沙維亦係啱啱好番冇耐，加上重點收購嘅蘇亞雷斯仍然坐緊波監，球隊喺呢個時候捧紅咗蒙尼亞艾哈達迪同埋辛度拉美利斯固然可喜，但亦突顯出前場無兵可用。

球王美斯季初都有輕傷，表現未達最好，尼馬嘅情況都差唔多，呢位巴西國腳早前更山長水遠去踢國際賽，唔多唔少都影響體力，所以巴塞隆拿近兩場西甲分別擊敗維拉利爾同畢爾包，都係出盡九牛二虎之力先可以喺尾段奠勝，欠缺過往由頭入到尾嘅霸氣，今晚歐聯分組賽喺魯營球場出擊，贏波雖然冇難度，但未致於大炒。

尼科西亞歐聯黑馬

尼科西亞並唔係新軍，佢哋喺2011至2012年度已經玩過歐聯分組賽，更加喺一致睇淡下爆大冷，力壓辛尼特、波圖同埋薩克達喺分組賽首名出線，16強再淘汰里昂，直至8強先輸俾皇馬而出局，所以睇少呢支塞浦路斯球隊嘅結果，隨時會惹嚟一身蟻。前利物浦同富咸球星懷斯克服傷患，可以同兩位巴西外援域仙奴斯、基斯杜禾文度卡一齊披甲，預計尼科西亞即使輸都唔會慘敗，「讓客」即係「+3」，絕對捧得過。