曼城下盤「仁」者無敵

曼城下盤「仁」者無敵 
 
歐聯死亡E組開打，主場嘅拜仁慕尼黑飽受傷兵問題困擾，加上同到訪嘅曼城喺實力、可調動兵源同埋近況等各方面都冇高低，變相讓波嗰隊蝕底，捧藍月亮受讓半球、一球下盤着數。（周三6，有線61及201台周四2:45am直播）

拜仁慕尼黑喺德超盃不敵多蒙特之後4戰不敗，但撇除盃賽輕取低組別球隊普斯辛蒙斯達之外，另外3場德甲都只係分別以2:1小勝禾夫斯堡、1:1賽和史浩克04，同埋上周以2:0擊敗史特加，沿途未見到有王者霸氣，如果唔係列貝利上仗對史特加以後備身份復出埋齋，投注拜仁嘅球迷更加會連續3場波輸盤損手，真係冇陰公。
沙比阿朗素由皇馬加盟，固然可以增強拜仁實力啦，而由羅馬過檔嘅中堅貝拿迪亞，喺級數上更勝傷完再傷嘅畢斯杜巴，不過兩個新援始終係雙拳難敵四手，拜仁本身嘅傷兵問題並冇改善過，舒韋恩史迪加、查維馬天尼斯、堤亞高艾簡達拿同埋拿菲爾繼續要養傷，洛賓亦都未趕及傷癒，加上羅拔利雲度夫斯基季初腳風唔順，單靠湯馬士梅拿喺前場單天保至尊唔係辦法。

梅拿單天難保至尊

曼城近3場英超只得勝和負各一，表現同樣唔算突出，不過上周兩度落後俾阿仙奴都可以追成平手完場，相信會增強陣營內嘅士氣，更何況王牌箭頭阿古路已全面傷癒，近4仗更取得3球「士哥」，幫手做供應嘅大衛施華同捷西斯拿華斯亦有狀態，藍月亮作客安聯球場真係唔容易輸波。

沙格拿代薩巴列達唔蝕底

薩巴列達因為要坐波監，今仗無緣出征德國，幸好曼城今屆簽咗法國右閘沙格拿，呢位前阿仙奴球星同樣具備級數，可以將薩巴列達缺陣嘅影響減至最低，並且同高拉洛夫喺兩邊發動側擊。
鑑於兩隊實力好接近，連近況同傷停情況亦相似，基本上冇高低可言，拜仁要讓波當然蝕底，捧曼城受讓半、一下盤。