A米平盤「帕」案叫絕

A米平盤「帕」案叫絕

今晚最矚目嘅意甲戲碼，相信會喺帕爾馬主場硬撼AC米蘭，事關費蘭度托利斯會首度披上紅黑兵團戰衣，勢要證明自己仲係一級射手，既然足智彩只係開平手盤，不妨捧費托買A米。（周日62，無綫網絡電視301頻道周一2:45am直播）

帕爾馬喺意甲首輪不敵升班馬切塞納0:1，突顯攻不銳守不穩嘅缺點，教練鄧納東尼賽後嬲到冇出席記招，要由球會體育總監里安拿迪代勞，但佢竟然將輸波責任歸咎於上季結束後被褫奪歐霸盃參賽資格，指球員士氣依舊低落，都過咗一個暑假啦，輸俾升班馬之後「講呢啲」，唔多通喎！
卡斯辛奴據報已經傷癒，是役可以復出，不過另一前鋒普斯就要倦勤，柏拿甸奴、柏度菲臘比文迪斯同柏列達都因傷未踢得，帕爾馬陣容依舊唔完整，而最尷尬嘅就係比亞比安尼，呢位前鋒早前舉晒波衫，以為成功轉投今仗對手AC米蘭，點知被A米用作交換籌碼嘅薩卡度唔接受帕爾馬合約，搞到比亞比安尼無癮留低。

恩沙基搵到贏波方程式

AC米蘭季前熱身賽表現差勁，但開咧首輪意甲竟然輕取實力唔錯嘅拉素3:1，睇嚟教練恩沙基已經搵到佢嘅方程式，雖然巴洛迪利離隊，但A米引入咗車路士孖寶費蘭度托利斯同雲堅基爾，鑑於艾沙拉維又傷，故此費托九成擔正，以佢嘅能力，嚟到意甲簡直超班，紅黑兵團執到寶。
如果唔係帕爾馬主場，足智彩亦唔會保守開個平手盤，但對於捧紅黑兵團嘅球迷嚟講，呢個盤絕對係坐走望贏，有強援壓陣嘅AC米蘭千祈唔好錯過呀！