利華讓主「不」容錯過

利華讓主「不」容錯過 
 
新球季開局暢順嘅利華古遜，喺今晚嘅德甲獨腳戲主場出擊，迎戰連和3場嘅雲達不來梅，明顯被莊家一致睇好，否則主勝唔會得1.24倍，所以「讓主」雖然熱到得1.74倍，但穩陣收錢又唔怕買。（周五16，有線61及201台周六2:30am直播）

利華古遜強勢開局，先喺德國盃大炒地區球隊瓦爾達爾格斯海姆6:0，然後喺歐聯附加賽兩勝哥本哈根，主場一戰仲大勝4:0，德甲開鑼又以2:0作客擊敗多蒙特，而喺國際賽檔期之前，利華古遜亦輕取哈化柏林4:2，唔單止場場都贏盤，仲九成開出入球大，唔理對手破唔破到蛋，自己都肯定至少入兩粒，簡直係捧場客嘅恩物。
射手傑斯寧肯定係目前陣中狀態最好嘅球員，而謝華積、史柏希斯、祖利安白蘭特同埋比拿拉比都唔執輸，紛紛喺對哈化柏林一戰入波，最重要係利華古遜目前只得拿斯賓達一個傷兵，其餘主力好似羅比古斯、卡斯特羅、連拿迪斯同埋史柏希斯全部健康，近乎「夫添」下值得睇好。

不來梅開季唔識贏

雲達不來梅開季後3連和，德國盃對低組別球隊伊勒迪森喺法定時間賽和1:1，加時先淘汰對手晉級，兩場德甲分別賽和哈化柏林2:2，同埋1:1迫和賀芬咸，但由於不來梅陣中冇乜球星，前車路士球員迪山度，同埋去過祖雲達斯嘅艾利亞已經最「最紅二人組」，所以都冇乜人寄予厚望。
其實不來梅目前傷兵情況幾嚴重，包括奧斯簡爾迪林同奧利華侯辛共有8件十字軍，所以今晚作客利華古遜死硬，1.74倍「讓主」絕對係熱得有道理。