“紅魔”搞邊科？

“紅魔”搞邊科？

曼聯在英超開季繼續令人大失所望，對住史雲斯與新特蘭兩支中游球隊，竟然只得一和一負，寄予厚望嘅雲戈爾並未為“魔粉”帶來驚喜，帶來嘅只有驚訝，因為昨晨場聯賽盃，竟然慘吞英甲球隊米爾頓凱恩斯四蛋。到底曼聯班波搞邊科？真係百思不得其解。

睇返場聯賽盃，曼聯的確輸在好多因素，首先雲戈爾派出唔少邊緣球員，包括話要清洗嘅香川真司、安達臣、蘭尼及“小豆”靴南迪斯。除香川早段傷出無話可說外，其餘三位仁兄表現真係好似“等走”一樣，鬥心完全不足。入替香川嘅贊奴沙更加夢遊球場，可能知道“天使”已經降臨，自己應該已無立足之地。防線伊雲斯已經欠缺安全感，仲要帶住三個“新丁”，係今場波最大死穴。總括嚟講今場波輸在冇戰意，冇拼勁。

現在有兩個問題出現：一，究竟雲戈爾有冇方法可以令球隊扭轉乾坤？二，破英超轉會費最高紀錄嘅“天使”又可唔可以救到“紅魔”？“魔粉”唯有拭目以待。